SERIKALI IMEKABIDHI PIKIPIKI ZAIDI YA 2500 KUBORESHA ELIMU NCHINI

Wizara ya Elimu, Sayansi na Teknolojia Leo imekabidhi Pikipiki zaidi ya 2500 kwa  Waratibu Elimu Kata ili ziwasidie katika kutekeleza majukumu yao kwa lengo la kuimarisha Elimu hapa nchini.

Pikipiki hizo zinakabidhiwa Leo Jijini Dar es Salaam na Waziri wa Elimu, Sayansi na Teknolojia Profesa  Joyce Ndalichako ambapo amesema Wizara ya Elimu kupitia Mradi wa Kukuza Stadi za Kusoma, Kuandika na Kuhesabu (LANES)  umenunua Pikipiki hizo 2894 kwa zaidi ya shilingi bilioni  Nane.

Waziri wa Elimu, Sayansi na Teknolojia Prof. Joyce Ndalichako pamoja na Waziri wa Nchi, Ofisi ya Rais TAMISEMI Selemani Jafo wakikata utepe kuashiria makabidhiano ya Pikipiki zilizotolewa na Wizara ya Wizara ya Elimu kupitia Mradi wa Kukuza Stadi za Kusoma, Kuandika na Kuhesabu (LANES) wanaoshuhudia tukio hilo ni Naibu Waziri wa Elimu, Sayansi na Teknolojia Wiliam Ole Nasha, Kaimu Katibu Mkuu Wizara ya Elimu, Sayansi na Teknolojia Pfor. James Mdoe na  Mkuu wa Mkoa wa Dar es Salaam Paul Makonda 

Waziri Ndalichako amesema pikipiki hizo zitasambazwa nchi nzima kupitia Ofisi ya Rais TAMISEMI.

"Rais alipoingia madarakani alihaidi kuimarisha ubora wa Elimu, sasa moja ya mikakati ya kutekelez hilo ndiyo maana hii Leo tunashuhudia vitendea Kazi hivi ambavyo vitasambazwa nchi nzima, lengo hapa ni kuhakikisha Elimu  inayotolewa inakuwa bora na kuhakikisha  nchi inakuwa na matokeo chanya kiuchumi” amesema Ndalichako.

Waziri Ndalichako pia amewataka waratibu elimu Kata hao kuhakikisha pikipiki hizo zinatumika kwa ajili yakusimamia elimu katika maeneo yao na kupandisha ufaulu na si vinginevyo.

Waziri wa Elimu, Sayansi na Teknolojia Prof. Joyce Ndalichako pamoja na Waziri wa Nchi, Ofisi ya Rais TAMISEMI Selemani Jafo wakizijaribu Pikipiki zilizotolewa kwa Waratibu Elimu Kata nchini Kata ili ziwasidie katika kutekeleza majukumu yao wengine katika picha ni Naibu Waziri wa Elimu, Sayansi na Teknolojia Wiliam Ole Nasha, Kaimu Katibu Mkuu Wizara ya Elimu, Sayansi na Teknolojia Pfor. James Mdoe na  Mkuu wa Mkoa wa Dar es Salaam Paul Makonda

Kwa upande wake Waziri wa nchi, Ofisi ya Rais TAMISEMI Selemani Jafo amewataka waratibu elimu kata kuhakikisha wanasimamia taaluma katika maeneo yao.

Aidha, Jafo amewaagiza Wakurugenzi wa Mikoa, Halmashauri, Manispaa na Majiji kuweka utaratibu wa kuzihudumia pikipiki hizo katika maeneo yao.

Mmoja wa Waratibu Elimu Kata akijaribu kuendesha Pikipiki iliyokabidhiwa kwake kwa ajili ya kumsaidia kusimamia elimu katika kata yake huku akishuhudiwa na Waziri wa Elimu, Sayansi na Teknolojia Prof. Joyce Ndalichako pamoja na Waziri wa Nchi, Ofisi ya Rais TAMISEMI Selemani Jafo na Naibu Waziri wa Elimu, Sayansi na Teknolojia Wiliam Ole Nasha

NAIBU WAZIRI OLE NASHA: VYUO VYA UFUNDI VINAMUANDAA KIJANA KUJIAJIRI NA KUAJIRIWA

Naibu Waziri wa Elimu, Sayansi na Teknlojia Mheshimiwa William Ole Nasha amewataka vijana kuachana na dhana ya kuwa ili kufanikiwa katika maisha lazima uwe umesoma hadi chuo Kikuu lakini ukweli ni kuwa vyuo vya ufundi  vinamuandaa kijana kuwa na uwezo wa kujiajiri na pia kuajiriwa ndani na nje ya nchi.

Naibu Waziri Ole Nasha ameyasema hayo wakati alipotembelea Baadhi ya Taasisi zilizochini ya Wizara hiyo ambazo zinashiriki maonesho ya sabasaba yanayoendelea jijini Dar es Salaam.

Naibu Waziri wa Elimu, Sayansi na Teknlojia Mheshimiwa William Ole Nasha akisikiliza maelezo ya jinsi mtambo wa kusaidia kufanya shughuli mbalimbali za kiuchumi kutoka kwa mmoja wa mwanafunzi wa VETA Moshi alipotembelea Baadhi ya Taasisi zilizochini ya Wizara hiyo ambazo zinashiriki maonesho ya sabasaba yanayoendelea jijini Dar es Salaam.

Mheshimiwa Ole Nasha amewahakikishia Watanzania kuwa Elimu inayotolewa hapa nchini ina viwango vya ubora unaokubalija na ndiyo maana  vijana wengi wanaajiriwa nje ya nchi  kutokana na kile wanachokuwa wamekisomea.

Naibu Waziri ameleza kuwa serikali ya awamu ya Tano imeboresha Mazingira ya kujifunzia na kufundishia katika vyuo vya Ufundi kwa kununua mitambo na vifaa vya kisasa ili kuimarisha mafunzo yanayotolewa na vyuo hivyo.

“ Uwekezaji huu mkubwa unalenga kuhakikisha vijana wanaohitimu katika vyuo vya Ufundi nchini wanakidhi soko la ajira la ndani na nje y nchi,”amesema Mheshimiwa Ole Nasha.

Naibu Waziri wa Elimu, Sayansi na Teknlojia Mheshimiwa William Ole Nasha akiwa katika banda la Chuo Kikuu cha Dar es Salaam wakati alipotembelea maonesho ya sabasaba yanayoendelea jijini Dar es Salaam.

Taasisi zinazoshiriki Mamlaka ya Ufundi stadi- VETA, CHUO Kikuu Cha Dar es Salaam, Chuo Kikuu Cha Mzumbe, Taasisi ya Teknolojia-DIT, Baraza la Ufundi la Taifa-NACTE, Chuo Cha Kumbukumbu ya Mwalimu Nyerere, Chuo Kikuu Cha Afya na Sayansi Shirikishi MUHAS  na Tume ya nguvu za Atomiki.

WAZIRI NDALICHAKO AMEWATAKA WATAFITI KUTAFSIRI MATOKEO YA TAFITI KUWA BIDHAA NA HUDUMA

Waziri wa Elimu, Sayansi na Teknolojia, Profesa Joyce Ndalichako amewataka watafiti wa afya nchini kupanga mipango ya utafiti kuzingatia matakwa ya wateja wanaowahudunia na kutafsiri matokeo ya tafiti hizo kuwa bidhaa na huduma.

Waziri Ndalichako ametoa kauli hiyo wakati wa kongamano la sita la kisayansi jijini Dar es Salaam na kusisitiza  kuwa utafiti unapotafsiriwa unaweza kubadilisha na kuboresha huduma zinavyotolewa pamoja na kusaidia taifa kufikia uchumi wa viwanda.  

Waziri wa Elimu, Sayansi na Teknolijia Pfro . Joyce Ndalichako akizungumza wajumbe (hawapo Pichani) wa kongoamano la sita la Kisayansi lililoandaliwa na Chuo Kikuu cha Afya na Sayansi Shirikishi Muhimbili (MUHAS) ambapo aliwasisitiza kupanga mipango ya utafiti kuzingatia matakwa ya wateja wanaowahudunia na kutafsiri matokeo ya tafiti hizo kuwa bidhaa na huduma

Kwa upande wake Makamu Mkuu wa Chuo hicho, Prof. Andrea Pembe amesema tafiti zitakazowasiliwashwa ni pamoja na masuala ya Afya ya Uzazi, Magonjwa yasiyo ya kuambukizwa, na magonjwa yanayoambukiza, Sera ya Afya, Madawa ya jadi na mbadala na Sayansi ya madawa.

Kauli mbiu ya Kongamano hilo ni “Uimarishaji wa Uchumi wa Viwanda kupitia Tafiti za Afya kwenye nchi zenye kipato cha chini”.

Waziri wa Elimu, Sayansi na Teknolijia Pfro . Joyce Ndalichako akipata maelezo kuhusu dawa mbalimbali za usafi zilizotengenezwa na wadau wa afya wakati wa  kongoamano la sita la Kisayansi lililofanyika Jijini Dar es Salaam

Lengo la Kauli Mbiu hiyo ni kusisitiza umuhimu wa matumizi ya matokeo ya tafiti za Kisayansi za afya katika kuchangia uimarishaji wa uchumi wa viwanda.

Kongamano hilo la kisayansi limeandaliwa na Chuo Kikuu cha Afya na Sayansi Shirikishi Muhimbili (MUHAS) na limeshirikisha jumla ya washiriki na wajumbe zaidi ya 400 kutoka nchini na nchi za Rwanda, Uingreza, Japan, Uturuki, Italy, Marekani na wenyeji Tanzania.

Waziri wa Elimu, Sayansi na Teknolijia Pfro . Joyce Ndalichako akiwa katika picha ya pamoja na baadhi ya wajumbe wa kongoamano la sita la Kisayansi lililoandaliwa na Chuo Kikuu cha Afya na Sayansi Shirikishi Muhimbili (MUHAS)

PROFESA MDOE APONGEZA UBUNIFU NA KUWATAKA WANAFUNZI WABUNIFU KUJITOKEZA KWA WINGI

Kaimu Katibu Mkuu Wizara ya Elimu, Sayansi na Teknolojia Profesa James Mdoe amewataka wanafunzi ambao wanakipaji cha ubunifu kuhakikisha wanajitokeza kwa wingi ili waweze kuonyesha vipaji vyao, kwa kuwa bunifu zao zinatakiwa zitatue changamoto mbalimbali hapa nchini.

Profesa Mdoe ameyasema hayo leo mkoani Dodoma wakati akifunga jukwaa la Maonesho ya ubunifu kwa vijana wenye umri kuanzia miaka 13 hadi 21 yanayosimamiwa na Wizara ya Elimu, Sayansi na Teknolojia chini ya Mradi wa kukuza Ujuzi, na stadi za kazi, ESPJ.

Kaimu Katibu Mkuu huyo amesema vijana wabunifu wakiendelezwa vyema watapata fursa ya kuchangia uchumi wa Taifa kupitia bunifu zao mbalimbali.

Kaimu Katibu Mkuu Wizara ya Elimu, Sayansi na Teknolojia Prof. James Mdoe akizungumza na wadau mbalimbali wa masuala ya ubunifu wakati akifunga maonesho ya ubunifu yaliyohusisha wanafunzi wa shule za msingi na Sekondari kutoka Tanzania bara na Visiwani, yaliyofanyika mkoani Dodoma.

Kwa upande wake Naibu Katibu Mkuu Dk. Ave Maria Semakafu akizungumza katika maonesho hayo ametambua mchango wa kijana Keton Mbwiro ambaye amehitimu Elimu yake ya Msingi na ameweza kubuni kijiko maalumu cha gari ambacho hutumika kuchimba na kuchota mchanga. Pia amebuni gari la kubeba vifaa vya ujenzi hivyo ameahidi kuwa kijana huyo atapelekwa shule ya ufundi ili aweze kujiendeleza.

“Keton Mbwiro ni kijana mdogo lakini ameweza kubuni kitu ambacho miaka ya nyuma tulizoea kuona vitu vya namna hii vinafanywa na wanafunzi wa vyuo vikuu, hivyo uwezo wake lazima tuuendeleze kwa kuhakikisha anakwenda shule ya Ufundi, pia ni vyema watanzania tukaachana na dhana ya kuwa vyuo vya ufundi ni vya useremala pekee bali ni zaidi ya hapo.” anasema Dk. Semakafu.

Kaimu Katibu Mkuu Wizara ya Elimu, Sayansi na Teknolojia Prof. James Mdoe akiwa na baadhi ya watendaji wa Wizara hiyo wakiangalia moja ya ubunifu uliohusisha mashine ya kusafishia/kuondoa uchafu kwenye mazulia. Maonesho hayo yamefanyika katika Chuo Kikuu cha Dodoma, Mjini Dodoma. 

Mradi wa kukuza Ujuzi na Stadi za kazi, ESPJ ni mradi wa miaka miatano ambao unatekelezwa kwa ushirikiano wa Wizara ya Elimu, Sayansi na Teknolojia pamoja na Benki ya Dunia, lengo likiwa ni kuhakikisha mkakati wa Serikali wa Tanzania kuwa

nchi ya Uchumi wa viwanda mpaka 2025 inatimia.

Prof. James Mdoe ambae ni Kaimu Katibu Mkuu Wizara ya Elimu, Sayansi na Teknolojia akiwa ameshika chupa yenye dizeli iliyotokana na kuyeyushwa kwa chupa za plastiki ambazo zimekwisha matumizi yake.

NAIBU WAZIRI WA ELIMU ASEMA SERIKALI HAITAFUMBIA MACHO VITENDO VYA UDHALILISHAJI DHIDI YA WANAFUNZI

Naibu Waziri wa Elimu, Sayansi na Teknolojia Mheshimiwa William Ole Nasha amesema Serikali haitafumbia macho vitendo vya udhalilishaji dhidi ya wanafunzi na kuwa Sheria kali zitachukuliwa kwa wale wote watakaobainika kuhusika na vitendo hivyo.

Naibu Waziri Ole Nasha ametoa kauli hiyo leo Mkoani Dodoma wakati wa mahojiano maalumu na Shirika la Utabgazaji la Taifa - TBC ambapo amesema Sheria za nchi ziko wazi kwa mtu yeyote atakaebainika kufanya vitendo vya ngoni basi adhabu yake ni miaka 15 jela hadi kifungo cha maisha.

Naibu Waziri wa Elimu, Sayansi na Teknolojia Mheshimiwa William Ole Nasha akifanya mahojiano na mtangazaji wa Shirika la Utangazaji Tanzania-TBC wakati huu ambapo Mataifa mbalimbali yakijielekeza katika kudhimisha siku ya mtoto wa Afrika. Mahojiano hayo yamefanyika Jijini Dodoma ambapo Naibu Waziri ameelezea pia mafanikio mbalimbali kuhusu sekta ya Elimu. 

Mheshimiwa Ole Nasha pia ameitaka Idara ya Uthibiti Ubora wa Shule nchini kuhakikisha unafanya ufuatiliaji kwa lengo la kuhakikisha Elimu bora inapatikana nchini kwa kuwa hilo ndiyo jukumu lao.

“Kuna maeneo bado Idara ya uthibiti ubora haijafanya vizuri, mfano katika hili tukio la St. Florence Idara hiyo ina kitu cha kujibu,” licha ya kuwa vyombo vingine vya Sheria vinaendelea na uchunguzi lakini na sisi ndani ya Wizara tunafanya uchunguzi kuona nani kazembea katika suala hilo,” alisisitiza Naibu Waziri Ole Nasha.

Naibu Waziri pia amewataka wazazi kuhakikisha watoto wote waliofika umri wa kwenda shule wanakwenda shule kwa kuwa hivi sasa Elimu msingi kuanzia darasa la kwanza hadi kidato cha Nne inatolewa bure.

Akizungumzia kuhusu viwanda Mheshimiwa Ole Nasha amesema vyuo vya ufundi ndiyo njia sahihi ya kulipeleka Taifa katika Uchumi wa Kati, hivyo kupitia vyuo hivyo Taifa litapata  nguvukazi na  sahihi ambayo itatumika kwenye viwanda.

SERIKALI YASEMA HAITAVUMILIA WALIMU WANAOSHIRIKI VITENDO VYA UDHALILISHAJI KWA WANAFUNZI

Serikali imesema haitavumilia vitendo vya udhalilishaji ambavyo vimekuwa vikijitokeza katika baadhi ya shule hapa nchini na kusisitiza kuwa hatua kali za kisheria zitachukukuliwa kwa wale wote watakaobainika kuhusika na vitendo hivyo.

Kauli hiyo imetolewa leo na Waziri wa Elimu, Sayansi na Teknolojia Profesa Joyce Ndalichako mkoani Dodoma wakati akikabidhi tuzo kwa wanafunzi waliofanya vizuri kitaifa katika masomo yao ya kuhitimu darasa la saba, Kidato Cha Nne na kidato Cha Sita kwa shule za serikali na zisizokuwa za serikali.

Waziri wa Elimu, Sayansi na Teknolojia Prof. Joyce Ndalichako akitoa cheti na fedha kwa mwanafunzi bora kitaifa katika masomo ya sayansi Sophia Juma  aliyefanya vizuri katika matokeo ya kumaliza kidato cha sita mwaka 2017. Utoaji wa tuzo hizo umefanyika mkoani Dodoma katika kilele cha maadhimisho ya Wiki ya Elimu

Waziri Ndalichako amewataka wanafunzi nchini kote kusoma kwa bidii, kuwa na nidhamu pamoja na kuishi kwa kufuata maadili ya kitanzania na siyo kuiga maadili ya watu wa nje.

“Wakuu wa shule nchini kote nawaagiza kuhakikisha mnasimamia kwa weledi malezi ya wanafunzi, ikiwa ni pamoja na kuhakikisha walimu mnakemea vitendo vya udhalilishaji ambavyo vimekuwa vikijitokeza katika shule hapa nchini. Suala hili nasema si la kufumbia macho na wale wale wote watakaobainika kuhusika na vitendo hivyo hatua kali za kisheria zitachukuliwa,” amesema Waziri Ndalichako.

Waziri Ndalichako amewaeleza wanafunzi hao kuwa suala la kupata ushindi ni rahisi lakini kudumu katika ushindi si kazi nyepesi.

Katibu Mkuu Wizara ya Elimu, Sayansi na Teknolojia Dk. Leonard Akwilapo akizungumza na wajumbe walioshiriki kilele cha maadhimisho ya Wiki ya Elimu (hawapo pichani) amesisitiza kuwa lengo la utoaji wa tuzo katika Wiki ya Elimu ni kutoa motisha na kuongeza ari kwa wanafunzi ili wafanye bidii katika masomo yao. Hafla ya utoaji wa tuzo hizo umefanyika leo Mkoani Dodoma katika Shule ya Sekondari Dodoma. 

Kwa upande wake Mkuu wa Mkoa wa Dodoma Dk. Binilith Mahenge amewapongeza wanafunzi waliofanya vizuri katika masomo yao kitaifa ambapo amesema Silaha pekee ya ujenzi wa Taifa na rasilimali za Taifa ni Elimu, ambapo pia amewataka wanafunzi kudumisha nidhamu  na maadili.

Akizungumza kwa niaba ya Serikali ya Uingereza katika maadhimisho hayo ya wiki ya Elimu Gertrude Mapunda  amesema serikali ya Uingereza itaendelea kuisaidia  Serikali ya Tanzania katika kuboresha sekta ya Elimu.

Waziri wa Elimu, Sayansi na Teknolojia Prof. Joyce Ndalichako akipokea maelezo ya awali kutoka kwa Mkurugenzi wa Sera na Mipango Gerald Mweli kuhusu vigezo vilivyozingatiwa katika kupata wanafunzi bora waliofanya vizuri kitaifa katika masomo yao ya kuhitimu darasa la saba, kidato cha nne na kidato cha sita kwa Shule za serikali na zisizokuwa za Serikali.  

WAZIRI NDALICHAKO ASHIRIKI KUAGA NA KUZIKA MAPACHA WALIOUNGANA MARIA NA CONSOLATA

·         AWATAKA WATANZANIA KUISHI KWA KUPENDANA

Waziri wa Elimu, Sayansi na Teknolojia amewataka watanzania kujenga tabia ya kupendana, kuvumilia na kuhurumiana katika maisha ya kila siku.

Waziri Ndalichako ameyasema hayo leo mkoani Iringa mara baada ya kuongoza mamia ya wananchi wakati wa ibada ya kuaga miili ya mapacha walioungana Maria na Cosolata katika viwanja vya Chuo Kikuu Cha RUAHA mkoani Iringa.   

Amesema Maria na Consolata katika uhai wao waliishi wakiwa wameungana kwa hiyo waliishi kwa kuvumiliana na kupendana pia.

Waziri wa Elimu Sayansi na Teknolojia Prof. Joyce Ndalichako akiaga miili ya mapacha walioungana Maria na Consolata katika viwanja vya Chuo Kikuu cha RUAHA Mkoani Iringa.

Amesema, Watanzania wanatakiwa kujiuliza kwa nini Maria na Consolata wamezaliwa Tanzania na Siyo nchi nyingine? amesisitiza kuwa watoto hao wamezaliwa nchini hapa ili iwe funzo kwa watanzania.

Maria na Consolata watazikwa kwenye jeneza moja litakalokuwa na misalaba miwili.

Maria na Consolata Mwakikuti walifariki jumamosi saa mbili usiku Juni 2 mwaka huu na miili yao itapumzishwa kwenye nyumba yao ya milele kwenye makaburi ya viongozi wa Kanisa Katoliki Tosamaganga mkoani Iringa.

Waziri wa Elimu, Sayansi na Teknolojia Prof Joyce Ndalichako akilia kwa huzuni mara baada ya kuaga miili ya mapacha walioungana Maria na Consolata katika Viwanja vya Chuo Kikuu cha RUAHA Nkoani Iringa.

Kwa upande wake sista Calista Ludega ambaye ni Mkuu wa Shirika la Mtakatifu Theresa wa Mtoto wa Yesu Jimbo Katoliki la Iringa amesema kuwa wamewazika Maria na Consolata mahala wanapolala Masista wa Maria Consolata kwa ajili ya kuwaenzi masista wa Wamishionari wa Consolata kwa kuwa wao wamekuwa sehemu kubwa ya malezi tangu waliopozaliwa watoto hao hadi wanapomaliza maisha yao duniani.

Familia ya Baba na mama wa mapacha hao kutoka Mkoani Mbeya na Kagera, masista wa Consolata wa Iringa na waombolezaji wengine wameungana katika kuwasindikiza katika safari yao ya mwisho duniani.

Waziri wa Elimu, Sayansi na Teknolojia Prof. Joyce Ndalichako akiweka saini kitabu cha maombolezo ya Msiba wa mapacha walioungana Maria na Consolata.