WAZIRI NDALICHAKO AWATAKA WATOTO WA KIKE KUSHIRIKI MICHEZO ILI KUEPUKA VISHAWISHI

Wanafunzi wa kike nchini wametakiwa kushiriki kikamilifu katika michezo ili kuimarisha afya ya akili katika masomo na kuepuka vishawishi vinavyoweza kuharibu ndoto zao.

Kauli hiyo imetolewa na Waziri wa Elimu, Sayansi na Teknolojia Prof. Joyce Ndalichako  wakati wa bonanza la mpira wa miguu maarufu kama MIRIAM CUP lililoshirikisha wanafunzi wa kike kutoka shule za msingi, secondari, vyuo vya ualimu na vile vya Maendeleo ya wananchi lililofanyika wilayani Kasulu, mkoani Kigoma.

Waziri wa Elimu, Sayansi na Teknolojia Profesa Joyce Ndalichako akikabidhi kombe wa wanachuo wa Chuo cha Ualimu Kasulu kilichopo Wilaya ya Kasulu Mkoani Kigoma baada ya kuibuka kidedea katika mechi zilizoshindanisha wanafunzi wa kike kutoka shule za Msingi, Sekondari, Vyuo vya Ualimu na vile vya Maendeleo ya wananchi vilivyopo katika Halmashauri ya Kasulu.

Waziri Ndalichako amesema  lengo la bonanza hilo ni kutoa hamasa kwa watoto wa kike kujiepusha na mimba za utotoni  na kuwa michezo ikitumika vizuri ina nafasi kubwa ya kumkomboa mtoto wa kike kielimu.

'' Michezo inachangamsha akili, michezo inajenga afya iliyobora lakini pia michezo ni ajira na inaondoa vishawishi,” alisisitiza Waziri Ndalichako.

Waziri wa Elimu, Sayansi na Teknolojia Profesa Joyce Ndalichako akisalimiana na wanafunzi wa kike ambao wameshiriki bonanza la mpira wa miguu almaarufu MIRIAM CUP lililoandaliwa na mdau wa Elimu Miriam Ntakisivya kwa lengo la kuhamasisha wanafunzi wa kike kukataa mimba za utotoni na kuendelea na masomo.

 Waziri Ndalichako amempongeza muandaaji wa bonanza hilo ambaye ni Mdau wa Elimu Miriam Ntakisivya na kusema kuwa bonanza hilo liwe endelevu ili kuleta hamasa kwa wanafunzi wa kike mkoani Kigoma kufanya vizuri katika masomo na kupunguza mimba za utotoni.

Kwa upande wake Mkuu wa Wilaya ya Kasulu Kanali Simon Anange amesema wilaya hiyo kwa miaka mitatu mfululizo kuanzia mwaka 2016 kumekuwa na ufaulu mdogo kwa wanafunzi wa kike wanaomaliza kidato cha nne, hivyo bonanza hilo limewaleta pamoja wazazi, walimu na jumuiya nzima ya Kasulukwa lengo la kukumbushana umuhimu wa kuwapa nafasi watotowa kike kwenye masomo.

Wanafunzi wa kike walioshiriki bonanza la mpira wa miguu wakicheza mpira katika kiwanja cha mpira kilichopo Wilaya ya Kasulu Mkoani Kigoma.

Naye muandaaji wa Bonanza hilo Miriam Ntakisivya amesema ameamua kuanzisha bonanza hilo baada ya kuona watoto wa kike mkoani humo  wanashawishiwa na vitu vidogo na kuacha shule wakiwa na umri mdogo na hivyo kuamua kuwaleta pamoja kukataa vitendo hivyo kupitia michezo.

Bonanza hilo limeshirikisha timu za wasichana nane kutoka wilaya ya Kasulu na mechi kubwa iliyohusisha  timu za watani wa jadi Kasulu United FC na Bodaboda FC.

Muandaaji wa Bonanza la mpira wa miguu kwa wanafunzi wa kike katika wilaya ya Kasulu Miriam Ntakisivya akimpa cheti cha shukrani Waziri wa Elimu, Sayansi na Teknolojia Profesa Joyce Ndalichako

WAZIRI NDALICHAKO ATAKA WANAWAKE KUSHIKAMANA NA KUSAIDIA MAKUNDI YA WATU WASIOJIWEZA

Waziri wa Elimu, Sayansi na Teknolojia Prof Joyce Ndalichako amewataka wanawake kuwa mstari wa mbele katika kusaidia makundi ya watu wasiojiweza hasa watoto wanaoishi katika mazingira magumu.

Prof Ndalichako ametoa wito huo mkoani Kigoma wakati akizungumza katika kilele cha maadhimisho ya siku ya maombi ya dunia ya umoja wa wanawake  wa kikristo  Tanzania  CCT na kusema kuwa wanawake  wakiamua wana uwezo mkubwa wa kubadili maisha katika jamii.

Waziri wa Elimu, Sayansi na Teknolojia Profesa Joyce Ndalichako akizungumza wakati wa kilele cha maadhimisho ya siku ya maombi ya dunia kwa wanawake mkoani Kigoma. Amewataka wanawake kuwa mstari wa mbele kuyasaidia makundi ya watu wasiojiweza na hasa watoto wanaoishi katika mazingira magumu ili wapate haki zao za msingi hususan elimu.

Amesema wanawake ndio walezi wa watoto kuanzia ngazi za familia akiwafananisha na walimu kwani wao wana jukumu la kulea na kufundisha watoto wote.

“Wanawake wenzangu tukumbushane msemo ambao Mama Salma Kikwete ambae ni mke wa Rais Mstaafu wa awamu ya Nne Mhe. Dkt. Jakaya Mrisho Kikwete amewahi kusema kuwa mtoto wa mwenzio ni wa kwako hivyo tuwasaidie watoto yatima, wa mitaani na wale wanaoishi katika mazingira magumu ili waweze kutimiza ndoto zao hasa za  kupata elimu,” alisisitiza Waziri Ndalichako.

Waziri wa Elimu, Sayansi na Teknolojia Profesa Joyce Ndalichako (aliyepo katikati) akicheza na moja ya kwaya iliyotumbuiza wakati wa kilele cha maadhimisho ya siku ya maombi ya dunia kwa wanawake katika Kanisa la Anglikan lililopo mkoani Kigoma.

Pia, Waziri Ndalichako amewataka wanawake nchini kudumisha mshikamano miongoni mwao na kuunga mkono juhudi zinazofanywa na Mhe. Rais Dkt. John Magufuli kwa vitendo kwa kuhakikisha wanafanya shughuli mbalimbali za uzalishaji mali kwa lengo la kujipatia kipato.

Akiwa mkoani humo waziri Ndalichako pia aliwatembelea wagonjwa ambao wamelazwa katika hospitali ya rufaa ya  Kigoma Maweni na kutoa misaada mbalimbali kwa wagonjwa hao.

Waziri wa Elimu, Sayansi na Teknolojia Profesa Joyce Ndalichako akiwajulia hali baadhi ya wagonjwa waliolazwa katika hospitali ya rufaa ya mkoa wa Kigoma Maweni. 

SERIKALI YAAHIDI KUENDELEA KUBORESHA IDARA YA UTHIBITI UBORA WA SHULE

Serikali imesema idara ya uthibiti ubora wa shule ndiyo jicho kwa maendeleo ya Elimu ya nchi yetu na ndiyo maana idara hiyo imeendelea kuboreshewa mazingira ya kazi ikiwa ni pamoja na kupatiwa magari 45 kwa lengo la kuongeza ufanisi utendaji kazi.

Kauli hiyo imetolewa na Waziri wa Elimu, Sayansi na Teknolojia Prof. Joyce Ndalichako wakati akifungua kikao kazi kinacholenga kuwakumbusha wathibiti ubora wa shule wajibu wa utekelezaji wa majukumu yao.

Waziri Wa Elimu, Sayansi na Teknolojia Prof. Joyce Ndalichako akizungumza na Wathibiti Ubora wa Shule wakati akifungua kikao kazi hicho mkoani Morogoro

Waziri Ndalichako pia amesema katika kuboresha mazingira Wizara imejipanga kujenga ofisi 100 za wathibiti ubora wa shule, na kuwa fedha kwa ajili ya shughuli hiyo zipo tayari.


Wathibiti Ubora wa Shule wakifuatilia hotuba ya Waziri wa Elimu, Sayansi na Teknolojia wakati wa ufunguzi kikao kazi Cha siku nne kinachofanyikia mkoani Morogoro.

“Wathibiti ubora wa shule ni wadau muhimu kwa Maendeleo ya elimu ya nchi yetu, na kuwa nyingi ndiyo jicho la Serikali na ndiyo maana serikali imeendelea kuboresha mazingira ya utendaji kazi ili kuleta ufanisi,” alisema Waziri Ndalichako.

Kwa upande wake Mkurugenzi wa Idara ya uthibiti ubora wa shule Euphrasia Buchuma amesema kikao kazi hicho  cha siku nne, kina lenga kuwajengea uwezo wa kiutendaji watumishi wa Idara hiyo, kubadilishana uzoefu miongoni mwao, pamoja na kukumbushana matumizi sahihi ya fedha za Umma.

Wathibiti Wakuu Ubora wa Shule Wa Kanda na Wilaya wakifuatilia majadiliano wakati wa kikao kazi cha kukumbusha wajibu wa utekelezaji wa majukumu.

Kikao kazi hicho kimeshirikisha wathibiti wakuu ubora wa shule wa kanda na Wilaya zote 11.

Viongozi na baadhi ya ya Wathibiti Wakuu Ubora Wa Shule wakiwa katika picha ya pamoja .

WAZIRI NDALICHAKO ARIDHISHWA NA HATUA ZA UJENZI OFISI ZA WIZARA YA ELIMU KATIKA MJI WA SERIKALI IHUMWA

Waziri wa Elimu, Sayansi na Teknolojia Prof. Joyce Ndalichako leo ametembelea na kukagua hatua ya ujenzi wa ofisi mpya za Wizara ya Elimu, Sayansi na Teknolojia zinazojengwa kwenye Mji wa serikali Ihumwa, mkoani Dodoma na kusema kuwa ameridhishwa na hatua ya ujenzi iliyofikiwa.

Waziri wa Elimu, Sayansi na Teknolojia Prof. Joyce Ndalichako akikagua ujenzi wa ofisi za wizara anayoiongoza zinazojengwa katika mji wa serikali uliopo eneo la Ihumwa jijini Dodoma.

Waziri Ndalichako amesema kukamilika kwa ofisi hizo utasaidia utendaji kazi kuimarika kwa kuwa mazingira ya kufanyia kazi yanakuwa ni mazuri zaidi.

“Ofisi kwa ujumla ni nzuri zimejengwa vizuri naamini hata watumishi watakuwa na ari ya kufanya kazi kwa kuwa mazingira yatakuwa bora zaidi.” alisema  Waziri Ndalichako.

Waziri wa Elimu, Sayansi na Teknolojia Prof. Joyce Ndalichako akipata taarifa ya maendeleo ya ujenzi wa ofisi za wizara kutoka kwa Msimamizi wa Ujenzi, Kamishna Msaidizi Aron Lunyungu kutoka Shirika la Magereza.

Waziri Ndalichako pia  amemtaka Katibu Mkuu wa Wizara hiyo Dkt. Leonard Akwilapo kuhakikisha anasimamia kwa ukaribu ujenzi wa jengo pacha la wizara ili liweze kukamilika kwa wakati.

Naye Msimamizi wa ujenzi huo Kamishna Msaidizi Aron Lunyungu kutoka Shirika la Magereza amesema ujenzi umefikia katika hatua ya ukamilishaji na kwamba wanatarajia kukabidhi Jengo la Wizara baada ya wiki mbili kuanzi leo.

Ujenzi wa jengo la Ofisi za Wizara ya Elimu, Sayansi naTeknolojia katika mji mpya wa serikali ulianza Desemba 10, 2018.
 

Muonekano wa hatua ya ujenzi wa ofisi za Wizara ya Elimu, Sayansi na Teknolojia zinazojengwa katika mji wa Serikali uliopo eneo la Ihumwa jijini Dodoma.

SERIKALI YA TANZANIA NA ILE YA SUDAN KUSINI KUSHIRIKIANA KATIKA ELIMU

Serikali ya Tanzania na ile ya Sudan Kusini zimetiliana saini makubaliano ya ushirikiano katika sekta ya elimu ambapo wanafunzi wa Sudan Kusini watajifunza lugha ya Kiswahili lakini pia nchi ya Tanzania itapeleka walimu wa lugha ya Kiswahili Sudan Kusini pamoja na kubadilishana uzoefu na ujuzi kati ya nchi hizi mbili.

Makubaliano hayo yamefanyika mkoani Dodoma ambapo kwa upande wa Tanzania Waziri wa Elimu, Sayansi na Teknolojia Profesa Joyce Ndalichako ndiye aliyetia saini makubaliano hayo huku nchi ya Sudan Kusini ikiwakilishwa na Waziri wa Elimu wa nchi hiyo Deng Deng Hoc Yai.

Waziri wa Elimu, Sayansi na Teknolojia Prof. Joyce Ndalichako (Tanzania) na Waziri wa Elimu Deng Deng Hoc (Sudan Kusini) wakitiliana saini makubaliano ya kushirikiana katika masuala mbalimbali yahusuyo Elimu katika nchi hizi mbili. 

Waziri Ndalichako amesema makubaliano yanalenga kufungua fursa katika nchi hizo mbili, na kuwa Tanzania iko tayari kuhakikisha inaisaidia nchi ya Sudan Kusini kufikia malengo waliyojiwekea.

“Tukio hili ni muhimu, ambapo nchi ya Sudan Kusini wameomba ushirikiano katika sekta ya Elimu na kuwa Tanzania tunaihakikishia nchi  hiyo ushirikiano kwa kuchapisha vitabu vya somo la Kiswahili, Tanzania pia iko tayari  kwa walimu wa Kiswahili kwenda Sudan kufundisha somo hilo pia nchi hizo mbili zitaweza kubadilishana uzoefu katika eneo la mafunzo ya ufundi stadi," alisema Waziri Ndalichako.

Waziri wa Elimu, Sayansi na Teknolojia Prof. Joyce Ndalichako (Tanzania) na Waziri wa Elimu (Sudan Kusini) Deng Deng Hoc wakionesha mkataba wa makubaliano unaohusu ushirikiano katika sekta ya elimu ambapo wote kwa pamoja wamekubaliana kuendelea kudumisha umoja na ushirikiano kati ya nchi hizo mbili.

Kwa upande wake Waziri wa Elimu wa Sudan Kusini Deng Deng Hoc Yai ameishukuru Serikali ya Tanzania kwa kuendelea kudumisha umoja na ushirikiano kati ya nchi hizi mbili huku akisisitiza kuwa Tanzania ni nyumbani.

Waziri wa Elimu, Sayansi na Teknolojia Prof. Joyce Ndalichako akizungumza wakati wa hafla ya utilianaji saini wa makubaliano ya mashirikiano katika masuala mbalimbali yahusuyo elimu. Amesema makubaliano hayo yanalenga kufungua fursa kwenye sekta ya elimu katika nchi hizo mbili ikiwa ni pamoja na kubadilishana uzoefu na ujuzi.

Waziri Deng Deng amesema kwa sasa Kiswahili ni miongoni mwa lugha zinazoweza kushindanishwa na lugha nyingine za kimataifa kama vile Kingereza na  Kiarabu hivyo nchi hiyo imeona umuhimu kwa shule zao kuanza kufundisha lugha ya kiswahili shuleni.

Waziri wa Elimu Tanzania na Waziri wa Elimu Sudan Kusini wakifurahia jambo baada ya  kutiliana saini makubaliano ya ushirikiano katika masuala mbalimbali  kwenye sekta ya elimu.

SERIKALI YABAINISHA MIKAKATI YA KUZUIA MIMBA NA NDOA ZA UTOTONI

Serikali imesema inaendelea na mkakati wa kujenga mabweni katika shule mbalimbali za Sekondari hapa nchini ambazo ni za kutwa ili kuepusha watoto wa kike kupata mimba pamoja na kuzuia ndoa za utotoni.

Kauli ya Serikali imetolewa na Naibu Waziri wa Elimu, Sayansi na Teknolojia Mhe. William Ole Nasha wakati akifungua mkutano wa kimataifa wa kupokea na kujadili taarifa ya utekelezaji wa mradi wa Girls Inspire Tanzania wenye lengo la kuzuia ndoa za utotoni uliofanyika Jijini Dar es Salaam.

Naibu Waziri wa Elimu, Sayansi na Teknolojia Mhe Wiliam Ole Nasha akizungumza na wadau wa Elimu (Hawapo pichani) wakati wa ufunguzi wa mkutano wa kimataifa wa kupokea na kujadili taarifa ya utekelezaji wa mradi wa Girls Inspire Tanzania wenye lengo la kuzuia ndoa za utotoni Jijini Dar es Salaam

Naibu Waziri huyo amesema tatizo la ndoa za utotoni ni kubwa katika nchi nyingi hali ambayo inasababisha watoto wa kike kukosa haki yao ya msingi ya kupata elimu na kusababisha Taifa  kukosa wataalamu.

“Ndoa za utotoni zinafanya mtoto wa kike asisonge mbele katika safari yake ya elimu  na ndio maana serikali imekuwa ikichukua hatua mbalimbali   kuhakikisha tunazuia ndoa za utotoni na kuweka mazingira wezeshi ya kuwafanya watoto wa kike waendelee kubaki shuleni kupata elimu,” alisema Mhe. Ole Nasha.

Naibu Waziri wa Elimu, Sayansi na Teknolojia Wiliam Ole Nasha na Waziri wa Afya, Maendeleo ya Jamii, Jinsia, Wazee na Watoto Ummy Mwalimu wakiwa katika picha ya pamoja na baadhi wa wadau wa elimu waliohudhuria mkutano wa mkutano wa kimataifa wa kupokea na kujadili taarifa ya utekelezaji wa mradi wa Girls Inspire Tanzania.

Akizungumza wakati wa kufungua mkutano huo Waziri wa Afya, Maendeleo ya Jamii, Jinsia, Wazee na Watoto Mhe. Ummy Mwalimu amesema Wizara ya Afya na Wizara ya Elimu zinashirikiana kuhakikisha shule za msingi na sekondari zinakuwa na Walimu ambao watasaidia kutoa ushauri nasaha kwa wanafunzi kufahamu namna ya kujizuia kuingia katika  ndoa na mimba za utotoni.

Mradi wa Girls Inspire Tanzania una lenga kuzuia ndoa za utotoni unatekelezwa katika nchi za Tanzania, Msumbiji, Bangladesh, India na Pakistani na kufadhiliwa na na serikali za Canada na Australia ambapo kwa Tanzania umatekelezwa na Taasisi ya Elimu ya Watu wazima na Shirika lisolo la Serikali Kiota Women Health and Development, (KIHOWEDE).

Naibu Waziri wa Elimu, Sayansi na Teknolojia Wiliam Ole Nasha akiwa na  Waziri wa Afya, Maendeleo ya Jamii, Jinsia, Wazee na Watoto Ummy Mwalimu, Balozi wa Canada O’Donnell na Mwenyekiti wa Baraza la Usimamizi wa Taasisi ya Elimu ya Watu Wazima Tanzania Dkt. Naomi Katunzi wakifuatilia uwasilishwaji wa mada wa katika mkutano wa kimataifa wa kupokea na kujadili taarifa ya utekelezaji wa mradi wa Girls Inspire Tanzania.