JAMHURI YA MUUNGANO WA TANZANIA

WIZARA YA ELIMU, SAYANSI NA TEKNOLOJIA

Anuani ya simu “ELIMU” Simu: 026  296 35 33 Baruapepe:info@moe.go.tz Tovuti: www.moe.go.tz

Chuo cha Masomo ya Biashara na Sheria, Chuo Kikuu cha Dodoma (UDOM), Jengo Na. 10, S.L.P. 10, 40479 DODOMA. Tarehe: 14 Desemba, 2018.

WARAKA NA. 1 WA MWAKA 2018

MWONGOZO WA UUNDAJI NA UENDESHAJI WA KAMATI NA BODI ZA SHULE

Kwa mujibu wa Sheria ya Elimu Na. 25 ya mwaka 1978 na Rekebisho lake Sura 353 ya mwaka 2002 kila Shule ya Msingi na Sekondari sharti iwe na Kamati ya Shule (kwa shule za Awali na Msingi) au Bodi ya Shule (kwa shule za Sekondari) iliyo hai. Aidha, Serikali imekuwa ikitoa miongozo juu ya utaratibu wa kuunda na kuendesha Kamati na Bodi hizo.

Waraka huu unalenga kutoa mwongozo mahsusi kuhusu muundo, wajibu na uendeshaji wa Kamati na Bodi za shule.

1.0        KAMATI ZA SHULE ZA AWALI NA MSINGI/BODI ZA SHULE ZA SEKONDARI

1.1     Kamati za Shule za Awali na Msingi za Serikali na Zisizo za Serikali

Shule zote zitakuwa na Kamati (Kwa Shule za Awali na Msingi) na Bodi kwa Shule za Sekondari).

1.2   Sifa za Wajumbe na Utaratibu wa Uundaji wa Kamati na Bodi za Shule

a)            Itaundwa na wajumbe wasiopungua tisa (9),

b)            Diwani, Mwenyekiti na Katibu wa Serikali ya Kijiji/Mtaa (wa eneo shule ilipo) hawatakuwa na sifa ya kuwa wajumbe wa Kamati/Bodi ya shule. Hii ni kuepusha mgongano wa kiutendaji kutokana na jukumu lao la kuiwakilisha Serikali katika ngazi zao za utawala,

c)            Kamati itakuwa na vikao visivyopungua viwili (2) kwa mwaka. Mwenyekiti anaweza kuitisha kikao cha dharura kama kuna suala linalohitaji kujadiliwa,

d)            Wajumbe wa Kamati/ Bodi wanatakiwa wawe na sifa zifuatazo:

                                                  i.Wawe na elimu ya Kidato cha Nne au zaidi,

                                                ii.Wawe na shughuli halali za kujipatia kipato,

                                              iii.Uwiano wa wajumbe uzingatie jinsi zote mbili,

                                              iv.Mwenyekiti na Makamu Mwenyekiti achaguliwe na Wajumbe wa Kamati kutoka miongoni mwao.

e)            Kamati ya Shule itakuwa na kamati ndogondogo tatu (3) zifuatazo:

                                                i.     Kamati ya Taaluma, Malezi na Unasihi,

                                                ii.Kamati ya Fedha, Mipango na Miundombinu, na

                                              iii.Kamati ya Mazingira, Afya na Chakula.

f)              Wajumbe wa Kamati/Bodi za Shule watathibitishwa na Afisa Elimu wa Wilaya.

1.3 Wajibu na Majukumu ya Kamati ya Shule

a)            Kuandaa/kuidhinisha Mpango wa Maendeleo ya shule na mikakati ya utekelezaji wake,

b)            Kuitisha na kuendesha vikao vya wazazi na kutoa taarifa ya maendeleo ya shule,

c)            Kwa shule za serikali kuidhinisha matumizi ya fedha za shule na kusimamia matumizi bora ya fedha za uendeshaji na maendeleo ya shule,

d)            Kwa shule zisizo za serikali, kushauri namna bora ya matumizi ya fedha  kwa miradi ya maendeleo ya shule ikiwemo ukarabati wa miundombinu,

e)            Kuhimiza ujenzi wa shule na usafi wa mazingira ya shule na wanafunzi,

f)             Kwa shule za serikali, kusimamia ujenzi na ukarabati wa madarasa na miundombinu mingine na utunzaji wa mazingira ya shule,

g)            Kusimamia ufundishaji na ujifunzaji shuleni kwa kuhakikisha kuwa walimu wanafanya kazi zao kwa ufanisi,

h)            Kuhakikisha wanafunzi wote wanahudhuria masomo kwa mujibu wa sheria,

i)             Kuhakikisha shule inakuwa na Sanduku la Huduma ya Kwanza na pia shule inadumisha elimu ya afya shuleni kwa njia mbalimbali,

j)             Kuhakikisha huduma za Malezi na Unasihi kwa wanafunzi zinaendeshwa kwa ufanisi shuleni,

k)            Kutathmini uhalali wa kumsimamisha/kumfukuza shule mwanafunzi bila upendeleo wala kushawishiwa na mtu au kikundi chochote kabla ya kuhalalisha uamuzi huo,

l)             Kuhakikisha Kamati inakutana ndani ya wiki mbili inapotokea shule imependekeza kumsimamisha/kumfukuza mwanafunzi ili uamuzi sahihi utolewe kwa wakati kuepusha ucheleweshaji unaoweza kuathiri haki za kielimu za mwanafunzi husika pasipo sababu za msingi, na

m)         Kamati itafanya kazi kwa muda wa miaka mitatu (3).

2.0 MUUNDO WA KAMATI/BODI ZA SHULE

Katika kuunda Kamati na Bodi za Shule za Serikali na zisizo za Serikali mambo yafuatayo yatazingatiwa:

2.1   Wajumbe wa Kamati za Shule za Awali na Msingi za Serikali

                           i.            Mwalimu Mkuu ambaye pia atakuwa Katibu wa Kamati,

                        ii.            Mwalimu wa Taaluma katika shule,

                      iii.            Wawakilishi wawili (2) wa walimu shuleni,

                       iv.            Iwapo shule ina kitengo kwa ajili ya watoto wenye mahitaji maalum, Mkuu wa Kitengo naye atakua Mjumbe,

                         v.            Wajumbe watatu (3) watakaochaguliwa na mkutano wa wazazi, na

                       vi.            Mkazi jirani atakayeteuliwa na Mkuu wa shule.

2.2     Kamati za Shule za Awali na Msingi Zisizo za Serikali

                             i.         Mkuu wa shule ambaye atakuwa Katibu wa Kamati ya shule,

                           ii.         Mmiliki wa shule,

                         iii.         Mwalimu wa Taaluma,

                         iv.         Wajumbe watatu (3) watakaoteuliwa na Mmiliki wa Shule,

                           v.         Mwakilishi mmoja (1) wa walimu shuleni.  

                         vi.         Iwapo shule ina kitengo kwa ajili ya watoto wenye mahitaji maalum, Mkuu wa Kitengo naye atakua Mjumbe,

                    vii.            Mzazi mmoja (1) anayewakilisha wazazi wenye watoto katika shule hiyo atakayechaguliwa na Mkutano Mkuu wa Wazazi,

                  viii.            Mkazi mmoja jirani atakayeteuliwa na Mwenye shule.

2.3   Bodi za Shule za Sekondari za Serikali

                              i.         Mkuu wa Shule ambaye atakuwa Katibu wa Bodi,

                           ii.         Mwalimu wa Taaluma katika shule,

                         iii.         Wawakilishi wawili (2) wa walimu shuleni,

                          iv.         Iwapo shule ina kitengo kwa ajili ya watoto wenye mahitaji maalum; Mkuu wa Kitengo pia atakua mjumbe katika Bodi ya shule,

                            v.         Wajumbe watatu (3) wanaowakilisha wazazi wenye watoto katika shule hiyo watakaochaguliwa na Mkutano Mkuu wa wazazi, na

                          vi.         Mkazi jirani atakayeteuliwa na Mkuu wa shule.

2.4   Bodi za Shule za Sekondari Zisizo za Serikali

                    i.              Mkuu wa shule ambaye atakuwa Katibu wa Bodi ya shule,

                  ii.              Mmiliki wa shule,

                iii.              Mwalimu wa Taaluma,

                iv.              Wajumbe watatu (3) watakaoteuliwa na Mmiliki wa Shule,

                  v.              Mwakilishi mmoja (1) wa walimu shuleni.  

                vi.              Iwapo shule ina kitengo kwa ajili ya watoto wenye mahitaji maalum, Mkuu wa Kitengo pia atakua Mjumbe,

              vii.              Mzazi mmoja (1) anayewakilisha wazazi wenye watoto katika shule hiyo atakayechaguliwa na Mkutano Mkuu wa Wazazi,

            viii.              Mkazi mmoja jirani atakayeteuliwa na Mwenye Shule.

Waraka huu unafuta Nyaraka zote za awali zilizokuwa zinatoa Mwongozo kuhusu Kamati za Shule za Awali na Msingi na Bodi za Shule za Sekondari na utaanza kutumika kuanzia Januari, 2019.

Dkt. Edicome C. Shirima

KAIMU KAMISHNA WA ELIMU

Nakala:      Makatibu Tawala wa Mikoa,

                    Wakurugenzi wa Halmashauri za Wilaya/Mji/Manispaa/Jiji,

                    Wathibiti Ubora wa Shule Wakuu Kanda na Wilaya.

JAMHURI YA MUUNGANO WA TANZANIA

WIZARA YA ELIMU, SAYANSI NA TEKNOLOJIA

Anuani ya simu “ELIMU” Simu: 026  296 35 33 Baruapepe:info@moe.go.tz Tovuti: www.moe.go.tz

Chuo cha Masomo ya Biashara na Sheria, Chuo Kikuu cha Dodoma (UDOM), Jengo Na. 10, S.L.P. 10, 40479 DODOMA. Tarehe: 10 Desemba, 2018.

WARAKA WA ELIMU NA. 2 WA MWAKA 2018

UTARATIBU WA KUKARIRI DARASA KWA WANAFUNZI WA SHULE ZA MSINGI NA SEKONDARI

Serikali imekuwa na utaratibu wa kupokea na kushughulikia maombi ya kukariri darasa kutoka kwa baadhi ya wazazi na walezi wa watoto wanaoshindwa kuendelea na masomo kwa sababu mbalimbali. Aidha, Shule Zisizo za Serikali zimekuwa zikiwakaririsha darasa wanafunzi wanaoshindwa kufikia viwango vya ufaulu vinavyopangwa na shule husika.

Kufuatia hali hiyo kumekuwepo na malalamiko kutoka kwa wazazi na walezi kutokana na kutoshirikishwa ipasavyo katika kufanya uamuzi wa mwanafunzi kukariri darasa. Kutokana na changamoto zinazojitokeza kwenye suala hili wizara inapenda kutoa maelekezo kama ifuatavyo:

1.0 Kukariri Darasa

Maombi ya Kukariri darasa kwa wanafunzi wa Shule za Msingi na Sekondari yatashughulikiwa kama ifuatavyo:

(a)                  Maombi ya Kukariri darasa la I, II na III yatashughulikiwa na Halmashauri husika ambapo darasa la IV, V na VI kwa Shule za Msingi na kidato cha 1, 2, 3, na 5 kwa shule za Sekondari yatashughulikiwa na Mkoa;

(b)         Maombi ya kukariri darasa la VII kwa shule za Msingi na Kidato cha 4 na 6 ambayo ni madarasa ya mitihani ya mwisho ya Kitaifa yataendelea kutumwa kwa Kamishna wa Elimu ili kupata kibali cha kukariri; na

(c)                  Mwanafunzi atakayeomba na kukubaliwa kukariri katika ngazi ya Elimu ya Msingi na Sekondari atapewa fursa ya kukariri mara moja. Endapo mamlaka inayohusika itaona umuhimu wa Mwanafunzi kukariri darasa  mara ya pili, ataweza kupewa fursa hiyo.

(d)         Utaratibu wa Maombi ya Kukariri Darasa

                                 i.        Mzazi wa mwanafunzi wa darasa la I, II na III anatakiwa kuandika barua ya maombi ya kukariri darasa kwa Mkurugenzi wa Halmashauri husika;

                               ii.       Mzazi wa mwanafunzi wa  darasa la IV, V na VI kwa shule za Msingi na Kidato cha 1, 2, 3, na 5 kwa shule za Sekondari anatakiwa kuandika barua kwa Katibu Tawala wa Mkoa;

                        iii.            Mzazi wa mwanafunzi wa darasa la VII kwa Shule za Msingi na Kidato cha 4 na 6 kwa shule za Sekondari anatakiwa kuandika barua kwa Kamishna wa Elimu kulingana na darasa husika;

                        iv.            Maombi yote yapitie kwa Mkuu wa Shule anayosoma mwanafunzi na Mkurugenzi wa Halmashauri husika, na

                           v.            Kila barua ya maombi ni lazima iwe na viambatisho vifuatavyo:

a.      Picha 2 za mwanafunzi aina ya pasipoti;

b.     Namba ya kuandikishwa shuleni; na

c.      Nyaraka zozote muhimu kulingana na sababu ya maombi                                        yanayowasilishwa.

2.0    Kukariri Darasa Wanafunzi Wanaoshindwa Kufikia Viwango vya Ufaulu Vilivyowekwa na Shule

Wizara inakumbusha kuwa wanafunzi waliofaulu mitihani ya upimaji inayofanywa kitaifa (Darasa la IV na Kidato cha 2) wanakuwa na sifa ya kumaliza ngazi ya elimu husika bila kukariri.

Hata hivyo, kwa makubaliano ya maandishi kati ya mzazi au mlezi na Mkuu wa shule ya Serikali au isiyo ya Serikali, mwanafunzi ataruhusiwa kukariri Darasa kwa kufuata utaratibu ulioainishwa hapo juu ambapo mzazi atakuwa ameridhia.

Waraka huu unafuta nyaraka zote zilizotangulia zilizokuwa zikitoa maelekezo kuhusu utaratibu wa kukariri darasa na utaanza kutumika Januari, 2019.

Dkt. Edicome C. Shirima

KAIMU KAMISHNA WA ELIMU

WAZIRI NDALICHAKO AAHIDI KUSHUGHULIKIA UCHAKAVU WA MIUNDOMBINU VYUO VYA VETA NCHINI

Waziri wa Elimu, Sayansi na Teknolojia Mhe. Prof. Joyce Ndalichako ameahidi kushughulikia changamoto ya uchakavu wa miundombinu katika vyuo vya ufundi stadi vinavyomilikiwa na VETA ili vyuo hivyo viweze kutoa mafunzo bora yanayoendana na Teknolojia ya kisasa.

Waziri Ndalichako ametoa kauli hiyo wakati wa sherehe za mahafali ya 33 katika Chuo Cha VETA kilichopo katika Manispaa ya Moshi mkoani Kilimanjaro na kusisitiza kuwa Wizara ya Elimu, Sayansi na  Teknolojia ina jukumu la kuhakikisha Taasisi   zilizo chini yake zinakuwa  na mazingira bora  ya kazi , hivyo  iko tayari kupokea mchanganuo wa mahitaji ya vyuo vya ufundi stadi nchini ili vyuo hivyo viweze kufanyiwa kazi.

“Wizara ikiwezeshwa  vizuri ikafahamu mahitaji ya vyuo hivi vya Ufundi Stadi na kwa sababu ni kipaumbele cha serikali ya awamu ya Tano katika kuwezesha nchi kuwa na uchumi wa kati basi tuko tayari kupokea ushauri  wa wataalam ili tuweze kuhakikisha kuwa tunaimairisha mafunzo ya ufundi stadi kwa kiwango ambacho ndio kinahitajika na wataalam na wajiri pindi vijana wanaoomaliza mafunzo,” alisema Waziri Ndalichako.

Waziri wa Elimu, Sayansi na Teknolojia Prof. Joyce Ndalichako  akisikiliza maelezo kutoka kwa mhitimu  wa fani ya kukaanga Mvuke kwenye  maonesho ya Mahafali ya 33 Chuoni hapo. Aliyesimama kulia kwake ni Mkurugenzi Mkuu wa VETA, Dkt. Pancras Bujulu.

Waziri Ndalichako amesema kuwa  mfumo wa mafunzo kwa njia ya uanagenzi una manufaa siyo tu  kusaidia kuongeza udahili,  lakini pia mfumo huu unasaidia vijana kujifunza teknolojia mpya zilizopo viwandani, kusaidia vijana kupata ujuzi na uzoefu halisi unaohitajika mahala pa kazi katika fani husika na makampuni kuwa na uhakika wa nguvukazi yenye umahiri wa kiwango wanachokihitaji.

Kwa upande wake Mkurugenzi Mkuu wa Mamlaka ya Elimu na Mafunzo ya Ufundi Stadi - VETA- Dkt. Pancras Bujulu alisema kuwa baadhi ya vyuo vya VETA ni vikongwe mno na miundombinu yake imechakaa  na vinahitaji ukarabati.

Waziri wa Elimu, Sayansi na Teknolojia, Prof. Joyce Ndalichako akitazama nyaraka za kampuni ya LES Inspection iliyoanzishwa na wahitimu wa VETA ambao wamefuzu na kupata leseni za kutoa ithibati ya kazi za uungaji vyuma kwa kiwango cha kimataifa wakati akitembelea maonesho ya mahafali ya 33 ya Chuo cha VETA katika manispaa ya Moshi.

Dkt. Bujulu alimweleza Waziri Ndalichako kuwa pamoja na uchakavu wa Miundombinu lakini pia  vifaa na mashine zinazotumika kwenye karakana kwa ajili ya kufundishia nazo  zimechakaa na zingine  zimepitwa na wakati kutokana na mabadiliko ya kiteknolojia hivyo hazifai kutumika kufundishia, vifaa vinavyohitajika ni vile vinavyoendan na Teknolojia.

Jumla  ya wahitimu 174 wa fani mbalimbali  wamehitimu mafunzo yao katika mahafali hayo ya 33 katika Chuo hicho Cha VETA, manispaa ya Moshi mkoani  Kilimanjaro.

NAIBU WAZIRI OLE NASHA ASHIRIKI UJENZI WA SHULE WILAYANI SAME

Naibu Waziri wa Elimu, Sayansi na Teknolojia Mhe.William Ole Nasha ameshiriki shughuli za ujenzi wa vyumba vya madarasa katika shule ya msingi Ruvu iliyopo Wilayani Same Mkoani Kilimanjaro.

Mhe.Ole Nasha ameshiriki ujenzi huo na Wananchi wa Kijiji cha Ruvu Darajani wakati kukagua miradi ya inayotekelezwa na Wizara ya Elimu, Sayansi na Teknlojia katika Wilaya hiyo ambapo amewataka wananchi kuendeleza jitihada hizo ili kuweka  mazingira mazuri ya wanafunzi kusoma.

Naibu Waziri Wa Elimu, Sayansi na Teknolojia William Ole Nasha akishiriki ‘Msaragambo’ wa Ujenzi wa vyumba vya madarasa katika shule ya msingi Ruvu iliyoko Kata ya Ruvu Darajani Wilayani Same Mkoani Kilimanjaro alipofanya ziara kukagua miradi ya elimu inayotekelezwa katika Wilaya hiyo.

Kufuatia jitihada hizo za Wananchi Naibu Waziri Ole Nasha amewaahidi wananchi kuwa Wizara itajenga  vyumba viwili vya madarasa, mabweni mawili na matundu ya vyoo ikiwa ni kuunga mkono juhudi ambazo wananchi wa kijiji cha Ruvu Darajani wameonesha lakini pia kuwezesha wanafunzi kutulia shuleni na kusoma.

“Serikali ikiona eneo ambalo wananchi wameanza na wana hamasa ya kujiletea maendeleo haiwezi kusita kuja kusaidia, Wilaya ya Same mmeonesha mfano kupitia utaratibu wenu wa kufanya kazi kwa umoja na ushirikiano hivyo Wizara itaunga mkono juhudi hizi kwa kuwajengea vyumba vya madarasa, mabweni na matundu ya vyoo,” alisema Naibu Waziri Ole Nasha.

Naibu Waziri wa Elimu, Sayansi na Teknolojia William Ole Nasha akitoa aelekezo katika eneo ambalo vyumba viwili vya madarasa vitajengwa katika Shule ya Msingi Ruvu Iliyoko katika Kata ya Ruvu Darajani Wilayani Same Mkoani Kilimanjaro.

Naibu Waziri huyo pia amewataka wananchi wa Kijiji cha Ruvu Darajani ambao wanajihusisha na shughuli za ufugaji kuacha kutumia watoto kuchunga mifugo badala yake kuhakikisha wanatumia fursa ya Elimu bure kuwaandikisha watoto wote waliofikia umri wa kwenda shule.

Awali Mkuu wa Wilaya ya Same Rosemary Staki alimweleza Naibu Waziri wa Elimu kuwa changamoto ya upungufu wa vyumba vya madarasa katika shule ya msingi Ruvu ambayo imetokana na ongezeko la Wanafunzi waliohamishiwa shule hiyo kutokana na shule walizokuwa wakisoma miundombinu yake kuathiriwa na mafuriko yaliyotokana na mvua za masika za mwaka huu.

Katika ziara hiyo Naibu Waizri Ole Nasha pia alitembelea shule ya Sekondari Makanya, Chuo cha Maendeleo ya Wananchi Same na Shule ya Sekondari Same ambapo ameridhishwa na ukarabati ulivyofanyika katika shule kongwe hiyo .

Naibu Waziri wa Elimu, Sayansi na Teknolojia William Ole Nasha akikagua ukarabati wa miundombinu uliofanyika katika Shule ya Sekondari Same iliyoko Wilaya ya Same Mkoani Kilimanjaro. Ameridhishwa na namna ukarabati huo ulivyofanyika na kuwataka kutunza miundombinu hiyo ili iweze kutumika kwa muda mrefu.

SKAUTI WATAKIWA KUJENGA NA KULEA MAADILI MEMA KWA VIJANA

Waziri wa Elimu, Sayansi na Teknolojia Prof. Joyce Ndalichako amewataka viongozi wa Chama cha Skauti Tanzania kuwajenga na kuwalea vijana katika maadili mema ya kitanzania .

Waziri Ndalichako ametoa agizo hilo wakati wa hafla ya kumkabidhi Balozi Nicholas Kuhanga tuzo ya Elephant Award aliyotunukiwa na Chama cha Skauti Kanda ya Afrika iliyofanyika jiji Dar es Salaam ambapo amesema tuzo hiyo inatolewa ili Kutambua huduma iliyotukuka na mchango wa balozi huyo  katika maendeleo ya shughuli za Skauti barani Afrika.

“Ninawapongeza Viongozi wote wa Chama kwa kujenga na kulea maadili mema, na kwa juhudi zenu katika kupambana na mmomonyoko wa maadili ili kujenga taifa lenye wazalendo watakao iletea nchi maendeleo ya kweli” alisisitiza Waziri Ndalichako

Waziri wa Elimu, Sayansi na Teknolojia Prof. Joyce Ndalichako akimvisha nishani ya tuzo ya Elephant Award Balozi Nicholas Kuhanga aliyotunukiwa na Chama cha Skauti Kanda ya Afrika katika hafla ya kumkabidhi iliyofanyika jiji Dar es Salaam.

Waziri Ndalichako amesema Balozi Kuhanga ameiweka nchi katika kumbukumbu ya kihistoria katika ngazi ya Skauti Kanda ya Afrika kwa kuwa  tuzo aliyopata ina hadhi ya juu kuliko zote ndani ya Skauti Kanda ya Afrika, hivyo mchango wa Balozi Kuhanga ni wa kujivunia na ni mfano wa kuigwa, hasa kwa vijana ambao ni viongozi wa baadae.

Akizungumza katika hafla hiyo Kamishna Mtendaji wa chama hicho Eline Kitaly amesema Balozi Kuhanga amekuwa kiongozi wa mstari wa mbele katika shughuli za skauti, na hata alipostaafu kazi serikalini ameendelea kuwa kiongozi wa Skauti anayefundisha maadili mema kwa skauti pamoja na Viongozi waSkauti Tanzania.

Waziri wa Elimu, Sayansi na Teknolojia Prof. Joyce Ndalichako akimpatia zawadi Balozi Nicholas Kuhanga iliyotolewa na Chama cha Skauti Tanzania wakati wakuadhimisha miaka 100 ya skauti nchi, zawadi hizo zimekabidhiwa leo jijini Dar es Salaam. 

Kwa upande wake Balozi Nicholas Kuhanga ameishukuru Serikali ya Tanzania  kwa kumpatia elimu iliiyomwezesha  kufanya kazi zake kwa umakini na pia aliwashukuru watumishi wa skauti kwa ushirikiano waliompa mpaka kufikia hatua ya kupata tuzo hiyo.

UINGEREZA NA CANADA KUENDELEA KUSAIDIA SEKTA YA ELIMU

Serikali ya Tanzania kwa kushirikiana na Benki ya Dunia zimekubalina kuendelea kuimarisha programu za  Mpango wa Elimu kwa walioikosa (MEMKWA) na Mpango wa Elimu Jumuishi baada ya Kumaliza elimu msingi (IPPE), ili kuwezesha wanafunzi wanaokatisha masomo kabla ya kumaliza shule waweze kuendelea na masomo yao.

Kauli hiyo imetolewa na Waziri wa Elimu, Sayansi na Teknolojia Prof. Joyce Ndalichako wakati wa mazungumzo na Mkurugenzi Mkuu wa Afrika Mashariki na Kusini kutoka nchini Canada Mars Andre Fredette aliyeambatana na Balozi wa Canada nchini Tanzania Pamela O Donnell ambao wote kwa pamoja wamejadili masuala mbalimbali pamoja na nchi hiyo kuendelea kuisaidia Tanzania katika  Sekta ya Elimu.

Waziri wa Elimu, Sayansi na Teknolojia Prof. Joyce Ndalichako akisisitiza jambo wakati wa mazungumzo na Mkuu wa DFID Tanzania Beth Arthy aliyefika kwenye ofisi za Wizara ya Elimu, Sayansi na Teknolojia zilizopo jijini  Dar es Salaam kujadili masuala mbalimbali kuhusu sekta ya  Elimu

Waziri Ndalichako amesema nia ya serikali ni kuona kila mtoto wa kitanzania anayepaswa kupata elimu anaandikishwa na kubaki shule mpaka anapomaliza masomo yake ingawa kumekuwepo na Changamoto ya baadhi wa wanafunzi kukatisha masomo kutokana na sababu mbalimbali.

 “Ukitembea barabarani unakutana na watoto wadogo wakifanya biashara ndogondogo unapoongea nao wanakwambia wameacha shule ili kusaidia wazazi kufanya biashara hizo, wengine utawakuta wapo mashambani wanawasaidia wazazi kulima hivyo changamoto ya watoto kukatisha masomo ni kubwa, na ndiyo maana serikali inaona namna bora ya kuhakikisha wale wote wanaokatisha masomo wanajiendeleza”alisisitiza waziri Ndalichako

Waziri Ndalichako amesema programu ya MEMKWA inamwezesha mtoto ambaye hakwenda shule kabisa kusoma na kisha kufanya mtihani wa darasa la nne na baadaye anapofaulu huandikishwa katika  mfumo rasmi na kuendelea na masomo kama wanafunzi wengine wakati mfumo wa IPPF ni kwa ajili ya wanafunzi wanaokatisha masomo ya sekondari  unawawezesha kumaliza masomo hayo na kuendelea na elimu juu.

Waziri wa Elimu, Sayansi na Teknolojia Prof. Joyce Ndalichako akijadiliana na Mkurugenzi Mkuu wa Afrika Mashariki na Kusini kutoka Canada Mars Andre Fredette aliyeambatana na Balozi wa Canada nchini Tanzania Pamela O Donnell ambao kwa pamoja wamejadiliana namna bora ya kuboresha elimu nchini Tanzania.

Naye Mkurugenzi Mkuu wa Afrika Mashariki na Kusini kutoka Canada Mars Andre Fredett amesema Canada inajivunia uhusiano wa muda mrefu uliopo katika ya Tanzania na Canada ambao umewezesha nchi kupata misaada mbalimbali ya kuendeleza sekta ya elimu ambayo imewezesha watoto wa kike na kiume kupata elimu bora pamoja na kutoa mafunzo kwa walimu.

Waziri wa Elimu pia amefanya mazungumzo na Balozi wa Finlanda nchi Pekka Hukka na Mkuu wa Dfid Tanzania Beth Arthy ambao wamezungumzia masuala mbalimbali ya namna bora ya kuboresha elimu nchini ikiwepo masuala ya kuongeza fursa za upatikanaji wa elimu bora kwa kila mtoto wa kitanzania.